ബെംഗളൂരു: ബെംഗളൂരുവിൽ ജോലിക്ക് നിന്ന തൃശൂർ വാടാനപ്പള്ളി സ്വദേശിനി സുനിതയെ അതിക്രൂരമായി കൊലപ്പെടുത്തിയ കേസിലെ മുഖ്യപ്രതി പിടിയിൽ. കൊല്ലം സ്വദേശിയായ ദീപക് കൃഷ്ണനെയാണ് പൊലീസ് കന്യാകുമാരിയിൽ വെച്ച് അതിവിദഗ്ധമായി അറസ്റ്റ് ചെയ്തത്. തൊഴിലിടത്തിൽ വെച്ചുണ്ടായ ലൈംഗികാതിക്രമം ചെറുത്തതിലുള്ള വൈരാഗ്യമാണ് കൊലപാതകത്തിൽ കലാശിച്ചത്.
ബെംഗളൂരുവിൽ പ്രതിയായ ദീപക് നടത്തിയിരുന്ന നായസംരക്ഷണ കേന്ദ്രത്തിലായിരുന്നു സുനിതയും മറ്റ് രണ്ട് സ്ത്രീകളും ജോലി ചെയ്തിരുന്നത്. പ്രതി സുനിതയെ ലൈംഗികമായി പീഡിപ്പിക്കാൻ ശ്രമിച്ചതോടെ ഇവർ ശക്തമായി എതിർക്കുകയും, ജോലി ഉപേക്ഷിച്ച് നാട്ടിലേക്ക് മടങ്ങാൻ തീരുമാനിക്കുകയും ചെയ്തു. ഇതിൽ പ്രകോപിതനായ ദീപക് സുനിതയെ ക്രൂരമായി മർദ്ദിക്കുകയായിരുന്നു.
മർദ്ദനമേറ്റ് അബോധാവസ്ഥയിലായ സുനിതയെയും കൂടെയുണ്ടായിരുന്ന മറ്റ് രണ്ട് സ്ത്രീകളെയും മുറിയിൽ പൂട്ടിയിട്ട ശേഷം പ്രതി അവിടെ നിന്നും കടന്നുകളഞ്ഞു. പിന്നീട് വിവരമറിഞ്ഞെത്തിയ പൊലീസാണ് ഇവരെ രക്ഷപ്പെടുത്തി സുനിതയെ ആശുപത്രിയിൽ പ്രവേശിപ്പിച്ചത്. എന്നാൽ, ഗുരുതരമായി പരിക്കേറ്റിരുന്ന സുനിത പിന്നീട് മരണത്തിന് കീഴടങ്ങുകയായിരുന്നു.
പിടിയിലായ ദീപക് കൃഷ്ണൻ നിരവധി ക്രിമിനൽ കേസുകളിൽ പ്രതിയായ പിടികിട്ടാപ്പുള്ളിയാണെന്ന് പൊലീസ് വ്യക്തമാക്കി. 2017-ൽ ദുബായിൽ കോടികളുടെ തട്ടിപ്പ് നടത്തിയ ശേഷം വ്യാജ പാസ്പോർട്ട് ഉപയോഗിച്ചാണ് ഇയാൾ ഇന്ത്യയിലേക്ക് കടന്നത്.
തിരുവനന്തപുരത്ത് ഒരു മയക്കുമരുന്ന് കേസിലും ഇയാൾ ഉൾപ്പെട്ടിട്ടുണ്ട്. കൂടാതെ, കൊച്ചിയിലെ ഒരു മൃഗാശുപത്രിയിൽ വെച്ച് ബഹളമുണ്ടാക്കുകയും കറൻസി നോട്ടുകൾ കീറിയെറിയുകയും ചെയ്ത സംഭവത്തിലും ഇയാൾക്കെതിരെ നേരത്തെ കേസെടുത്തിരുന്നു. പ്രതിയെ വിശദമായി ചോദ്യം ചെയ്തു വരികയാണ്.